Am Samschtig, 20. Ouguscht hani mini Sponsore iglade zumene Apéro u hie no e Usschnitt us mire Dankesred:
Sit guet 7 Johr arbeite ig täglich für mini Tröim eines Tages i Welt-Cup zcho und das jetze ou scho fasch 3 Johr in Engelberg a der Sportmittelschule.
Ig has Privileg düre Sport grossartigi Persönlichkeite kenne z lehre aber ou me sälber besser kenne zlehre. Mini Limite und Gränze jede Tag ufs neue z sueche. Ig darf mi a wünderschöne Orte wieder finde woni das mache woni liebe, s Skifahre, isch eifach nume unglaublich.
All das wäri nid im geringste möglich ohni euch alli, denn ohni euchi Unterstützig, euches vertraue wo der mer schänked, hätti vor 4 Johr mini Tröim chöne begrabe. Wöu der finanziell Ufwand schlicht und eifach z gross wäri gse.
Mer isch völlig klar das ihr alli vöu ih meh investiered und ig hoffe das ig euch das im gliche Mass cha zrüg gäh mit mim Engagement im Sport, aber au ihr Schuel, mit mire Motivation und em Ehrgeiz und au mit mire Dankbarkeit woni verspüre für das was ihr für mich mached.
Schlussemend chani mini Tröim verfolge wöu ig euch als mini Sponsore und Gönner darf betitle aber au hinder de Kullisse findet sehr viel statt.
Us däm Grund möcht ig au mini Eltere wo so viel Tag ih Tag us für mich leiste, danke, sigi das s ganze Finanzielle, dr Taxidienst wo si immer wieder mache, wenn si mi mal wieder uf Engelberg, Spiez oder söst irgend wo müesse bringe, aber au das si scho ih junge Johr bis jetze no s Verständnis ufbringe für das was ig mache.
Denn so öbbis isch nid säubst verständlich! Es isch ou nid säubst verständlich, dass wenn sich die meisti Zit deheime alles um d Organisation vo mim Läbe drait, me no en verdätnissvolle Brüeder hed wo eim unterstützt. Darum möcht ig hüt nid nume euch Sponore und Gönner danke sonder ou no mire Familie, Mam, Pap und Raphael.
Mercii euch allen für d Unterstützig und danke sit Ihr alli cho.
